“Apel dramatik” i qeverisë për grevistët e urisë

“Apel dramatik” drejtuar emigrantëve grevistë të urisë në pallatin “Ipatia”, të ndalojnë grevën dhe të lejojnë kurimin e tyre bëri sot qeveria greke, duke përjashtuar njëkohësisht mundësinë e legalizimit të tyre.

Burime nga ministria e Brendëshme, ftuan sot grevistët e urisë, për të shkuar të gjithë në spital, duke mbrojtur kështu shëndetin e tyre, dhe të pranojnë propozimin e qeverisë në të cilin “nuk është e mundur të përmblidhet edhe legalizimi i tyre”, komentuan ata.

Ministria e Punës përgatit "paketa" asistence për emigrantët

Ka kaluar afati kohor që kryeministri grek Jorgos Papandreu i kishte dhënë ministrisë së brendshme dhe asaj të punës për t’i paraqitur paketën e re të masave për emigrantët. Bëhet fjalë për të gjithë ata shtetas të huaj të cilët për shkak të krizës ekonomike kanë humbur vendet e tyre të punës dhe si rrjedhim, e kanë të pamundur të rinovojnë lejet e qëndrimit.

Sipas burimeve nga Ministria e Punës, brenda javës që vjen, paketa e masave do të marrë rrugën e shqyrtimit të përshpejtuar dhe do të konsiderohet si një “çështje urgjente” zbatimi i menjëhershëm i saj. Nga kjo paketë e re masash do të përfitojnë vetëm emigrantët të cilët kanë patur status të ligjshëm dhe jo emigrantët e paligjshëm, të cilët erdhën në Greqi pas fushatës së fundit legalizuese të vitit 2005.

Banka e Greqisë: Të varfërit, varfërohen më shumë

Më të varfër janë bërë të varfërit gjatë dy vjetëve të fundit. Në këtë konkluzion ka arritur Banka e Greqisë.

Pasojat e masave të marra nga qeveria nuk kishin karakter progesiv për të gjithë ata që ishin të varfër.

Ndërsa e kundërta ka ndodhur me qytetarët me të ardhura vjetore të mëdha dhe pasuri të shumta. Këta “të pasur” u bënë më të pasur…

Drejtuesi i Bankës së Greqisë, Jorgos Provopulos, pas këtij konkluzioni, kërkoi që ndërhyrjet të cilat do të ndërmerren në vazhdim, të ofrojnë më shumë drejtësi sociale.