Fondi Europian financon me 323 milionë euro Greqinë për politikën e emigracionit

Greqia do të vazhdojë të marrë fonde nga Bashkimi Europian për të patur një politikë më rezultative për emigracionin.

Ndonëse, financimet janë prerë tashmë në shumë sfera të tjera, në këtë pikë BE duket se nuk do të kursehet.

Kështu, Greqia do të marrë gjithësej 323 milionë euro deri në vitin 2013 nga Bashkimi Europian për të intensifikuar politikën e saj në lidhje me shtetasit e huaj që banojnë në të ose hyjnë legalisht apo ilegalisht.

Djali i Gaddafit premton reforma në Libi

Pas trazirave të përgjakshme që po zgjasin prej ditësh në Libi, djali i presidentit Muammar al-Gadaffi, Saif al Islam Gaddafi premtoi reforma në vend.

Parlamenti do të mblidhet këtë të hënë për të diskutuar një varg ndryshimesh, tha ai në televizionin shtetëror.

Dy anijet iraniane kaluan Suezin

Dy anije luftarake iraniane me drejtim shtetin Sirian kaluan dje nga kanali i Suezit dhe tashmë po i drejtohen portit të Sirisë.

Lajmin e ka bërë të ditur televizioni shtetëror iranian, Al Alam.

“Dy anije luftarake kanë kaluar kanalin dhe po i drejtohen një porti sirian”, tha televizioni.

Izraeli e ka konsideruar si “një provokim” kalimin e anijeve luftarake iraniane, pasi është i pari që prej vitit 1979.

Albanews

Libia kërcënon tu hapë rrugë refugjatëve

Libia ka kërcënuar se nuk do të ndihmojë në pengimin e refugjatëve të tjerë nga Afrika, që përqiqen të shkojnë në Evropë. “Në qoftë se Bashkimi Evropian vazhdon të inkurajojë demonstrues pro-demokracisë, Libia do t’i japë fund bashkëpunimiit në çështjen e refugjatëve”. Këtë njoftoi agjencia e lajmeve Reuters , dje të dielën,  se i është bërë shumë e qartë ambasadorit hungarez në Tripoli nga diplomatët vendas.

Pavarësisht nga ky kërcënim i qartë i diplomatëve libianë, Ministrja e Jashtme e BE, Catherine Ashton bëri thirrje për dhënien fund të dhunës. “Duhet të fillojë menjëherë një dialog”, u tha ajo gazetarëve.

Albanews

Banka Islamike akordon huan për aksin Tiranë – Elbasan

Banka Islamike merr përsipër financimin e aksit rrugor Tiranë-Elbasan me një hua prej 350 milionë dollarësh që i akordon shtetit shqiptar, sikurse transmeton agjencia e lajmeve ANSAmed.

Interesi prej 5% i kredisë së akorduar  për një afat shlyerjeje 20 vjeçar, cilësohet nga  specialistët e ekonomisë  si mesatar.

Parlamenti shqiptar miraton kufizimin e imunitetit të deputetëve

Maxhoranca shqiptare  miratoi sot në komisionin e ligjeve kufizimin e imunitetit, i cili përbën ndryshime në rregulloren e parlamentit Forcat politike kanë mbajtur pozicione të ndryshme për këtë çështje.
Sipas mediave shqiptare, deputetet socialiste e cilësuan projekt-vendimin për kufizimin e imunitetit demagogji, anti kushtetuese dhe të pavlefshëm për prokurorinë, ndërsa mazhoranca theksoi se kjo është e vetmja rrugë kushtetuese për kufizimin e imunitetit për sa kohë që kryetari socialist Edi Rama po bllokon procesin e kufizimit të imunitetit nëpërmjet ndryshimit të Kushtetutës.

Aeroplanë ushtarakë bombardojnë Tripolin!

Aeroplanë ushtarakë bombardojnë në këto momente kryeqytetin e Libisë Tripoli, sipas kanalit të njohur televiziv Al Jazeera.

Qindra protestues të vdekur në kryeqytetin libian dhe qytete të tjera të vendit, nga dhuna e regjimit të Muamar Kadafit, denoncojnë organizma të pavarur ndërkombëtarë, ndërkohë që BE dhe SHBA, ende nuk po reagojnë aq sa pritet ndaj gjaderdhjes në vendin arab.

Albanews

Në grevë 48 orëshe arsimtarët e Athinës

Në grevë 48 orëshe hyjnë, nesër të martën dhe pasnesër të mërkurën, arsimtarët e ciklit të ulët dhe atij të mesëm në Greqi, sipas një deklarate të lëshuar nga sindikatat përkatëse. Arsimtarët protestojnë për uljen e rrogave të tyre, për uljen e buxhetit qeveritar për arsimin si dhe për bashkimin e pritshëm të enteve shkollore.

Sindikatat e të dyja cikleve vendosën gjithashtu të ndërmarrin një fushatë, për informimin e opinionit shoqëror, për të bërë të njohura pasojat e masave ekonomike tek arsimi dhe arsimtarët.

Marston: “Ariu i Argjendtë” i dedikohet Shqipërisë

Kineasti amerikan Joshua Marston dhe ai shqiptar Andamion Murataj u nderuan të shtunën me Ariun e Argjendtë të Berlinales së 61-të për skenarin e filmit “Falja e Gjakut”.

“Fakti që këtë çmim po e ndaj me Andamionin më gëzon veçanërisht. Sepse ai pasqyron më së miri bashkëpunimin e mrekullueshëm mes nesh. Për mua ky i dedikohet Shqipërisë, ndërsa Andamioni ua dedikon shkodranëve, pa të cilët ky skenar nuk do të ishte realizuar”, tha regjisori amerikan Joshua Marston mbas dhënies së çmimit të shtunën në mbrëmje në Berlin.

Eulex-i ngre akuza të reja për ish anëtarë të UÇK-së

Prokuroria Speciale e Kosovës ka ngritur aktakuzë edhe kundër dy ish-pjesëtarëve të UÇK-së për krime luftë kundër popullatës civile në një kamp në Cahan të Shqipërisë.

Haki Hajdari 48 vjeç nga Skënderaj, i njohur me nofkën “Haki Drenica” dhe Sali Rexhepi 55 vjeç nga Rashkoci i Gjakovës, akuzohen nga një prokuror ndërkombëtar se në bashkëveprim me Riza Alijaj-n dhe anëtarë të tjerë të UÇK-se, të paidentifikuar deri tani, kanë trajtuar civilë shqiptarë në mënyrë çnjerëzore në Cahan të Shqipërisë nga prilli deri në mesin e qershorit 1999, shkruan Koha Ditore.

Numri i të akuzuarve deri tani ka shkuar në pesë dhe pritet te ketë edhe të akuzuar tjerë për krime lufte.

Albanews

Rifillon ndërtimi i autostradës Korçë – Kapshticë

Pas gati dy vjetësh, gjithçka nis atje ku ishte lënë. Por tashmë pa problemet e pronarëve të tokave me të cilët kompania e ndërtimit ka rënë dakort për kompensimin e tyre monetar.

Investimi i këtij aksi rrugor prej 3 kilometra i gjatë, po kryhet nga qeveria shqiptare me një fond prej 300 milion lekësh. Firma ndërtuese po shfrytëzon kushtet e mira atmosferike të këtyre ditëve për të avancuar punimet.

Ky aks rrugor prej shumë vitesh ka qenë tejet i dëmtuar. Drejtuesit e mjeteve shpesh herë zgjatnin disa herë rrugën, për të mos dëmtuar automjetet, raporton gazeta “Shekulli”.

Autoriteti i Konkurrencës: Jo transparente bankat në Shqipëri

Befasues është raporti i Autoritetit të Konkurrencës për shërbimet bankare në Shqipëri.

Sipas tij, bankat jo vetëm aplikojnë tarifa të ndryshme për të njëjtin shërbim por nuk i informojnë klientët për ndryshimet që bëjnë për kushtet e punës.

Madje, duke bërë një krahasim me tarifat e shërbimeve bankare në rajon, Autoriteti i Konkurrencës arrin në konkluzionin se brenda të njëjtit Grup Bankar, bankat që operojnë në Shqipëri aplikojnë tarifa më të larta të shërbimeve bankare sesa bankat homologe në rajon, duke vështirësuar përfitimin e këtyre shërbimeve nga klientët dhe mundësinë e ndërrimit të bankës.

Shqipëri: Hapen 1137 vende të reja pune në administratë

Mundësi punësimi në kohë të vështira!

Gjithçka bëhet e mundur nga qeveria shqiptare e cila ka nxjerrë vendimin për hapjen e vendeve të punës për 1137 punonjës me kontratë të përkohshme.

Ky kontigjent do t’i shtohet administratës shtetërore për vitin 2011, duke u pozicionuar në disa prej njësive të qeverisjes qendrore.

Estoni: Dhjetë fëmijë humbën jetën nga zjarri në jetimore

Në qytetin bregdetar të Haapsalou, në perëndim të Estonisë, dhjetë fëmijë humbën jetën dje, pas një zjarri të shkaktuar në pavionin e mjekimit spitalor, njoftuan mjetet lokale të informimit publik.

Shkaku i zjarrit, që la pas rezultatet tragjike,ende nuk dihet.

Albanews

Vazhdon gjakderdhja në Libi, djali i Kadafit akuzon “separatistët”

Djali i liderit të Libisë Muamar Kadafi, Saif al-Islam Kadafi, me një deklaratë të tijën në kanalin shtetëror LIBYAN TV paralajmëroi se “Libia zhytet në kaos ndërkohë që grupe përçarëse kërcënojnë unitetin e vendit”.

Dëshmi vonë në mesnatën e së dielës nga kryeqyteti i Libisë Tripoli, bëjnë fjalë për të shtëna me armë në rrugët e qytetit, për përplasje të policisë me protestues dhe për makina që digjen. Sipas të të njëjta burimeve që u bënë nëpërmjet telefonave celualar në agjenci ndërkombëtare, dëgjohen zëra njerëzish në rrugët e kryeqytetit,  shumë rrugë të së cilit janë zhytur në errësirë pasi është ndërprerë rryma elektrike.

Dënim me vdekje për autorin e sulmit terrorist në Bombai

Drejtësia Indiane vendosi sot dënimin me vdekje të të vetmit person që mbijetoi nga terroristët e sulmit të përgjakshëm në 2008-ën në Bombai, të cilët shkatuan vdekjen e 166 personave, transmetuan mjetet informative të Indisë.

Sipas të njëjtave burime, dy gjykatësit e Gjykatës së Lartë të Bombait, nuk pranuan apelin e pakistanezit Mohamed Azmar Amir Kasab, përsa i përket pjesëmarrjes së tij në sulme.

23 vjeçar i akuzuar, i vetmi person që mbijetoi nga 10 autorët e sulmeve, ishte dënuar Majin e kaluar me vdekje nga një gjykatë speciale.

Albanews

Bujar Bukoshi në postin e zv/kryeministrit të Kosovës

Drejtuesit e Partisë Demokratike të Kosovës dhe ata të Listës “Ibrahim Rugova”, pas takimeve të zhvilluara pa praninë e medieve, kanë nënshkruar marrëveshjen për koalicion. Subjekti që ka vetëm një deputet në Kuvend do të ketë një zëvendëskryeministër, një ministër dhe dy zëvendësministra.

Konfirmimin për zyrtarizimin e koalicionit e bëri të ditur për “Zërin”, Astrit Haraqija nga Lista “Ibrahim Rugova”. Ai tha se nga marrëveshja e arritur, Lista do të ketë një zëvendëskryeministër, Ministrinë e Ambientit dhe Planifikimit Hapësinor dhe do të ketë dy zëvendësministra.

Nis “de facto” fushata elektorale në Shqipëri

Në Jug të Shqipërisë  subjektet politike  kanë nisur aktivitetet paraelektorale për zgjedhjet  e pritshme vendore të 8 majit. Lëvizja Socialiste për Integrim zhvilloi në Gjirokastër  një takim me përkrahësit e saj . Kryetari i kësaj partie Ilir Meta  vlerësoi se zgjedhjet vendore janë momenti që e afrojnë më shumë politikën me   qytetarët.

Zoti Meta  i cili po hetohet nga prokuroria  nën dyshimet  se ka bërë presion për të marrë ryshfet ndaj ish-ministrit të Ekonomisë, Dritan Prifti, në një video të regjistruar nga ky i fundit, u qëndroi larg komenteve për këtë çështje. Ai u tha përkrahësve të tij në Gjirokastër se  ”LSI ka ndezur motorët për të arritur sukses në zgjedhjet vendore duke nisur përcaktimin e kantidatëve më të mirë”.

Nisin targat e reja sipas direktivave të BE-së

Ministria e Transporteve njoftoi se ka nisur zyrtarisht proçesin e pajisjes së automjeteve me modelin e ri të targave, sipas udhëzimeve të Bashkimit Europian.

“Ky shërbim, do të kryet në rastin e targimit të parë të mjetit, apo dëmtimit të targave ekzistuese, me të njejtat tarifa që kanë ekzistuar edhe më parë. Për herë të parë pajisen me targa të veçanta edhe makineritë bujqësore, makineritë e ndërtimit si dhe rimorkiot. Gjithashtu njoftojmë se zëvendësimi i targave të vjetra, me targat e reja, do të bëhet në mënyrë graduale”, është shprehur Arminda Qylafku, zëdhënëse e MPPT.

Sipas Ministrisë, modeli i ri i targave do të jetë një kombinim i katër shkronjave dhe tre numrave, çka do të zgjidhë edhe problemin e përfundimit të kombinimeve ekzistuese midis numrave dhe shkronjave për targat aktuale. (tch)

Albanews

60 të akuzuar për incidentin në kalanë e Shkupit

Ministria e Brendshme e FYROM-it tha të mërkurën (16 shkurt) se ka ngritur padi kundër 60 vetëve, pjesmarrës në përleshjet etnike në kalanë e Shkupit të dielën.

Tetë vetë, përfshirë dy police, u plagosën kur të rinjtë shqiptarë dhe sllavomaqedonas u konfrontuan për shkak të ndërtimit të një kishe-muze në teritorin e Kalasë. Ndërkohë, partia SDMS, e opozitës kryesore, akuzoi koalicionin në pushtet për nxitjen e tensioneve ndëretnike. VMRO-DPMNE në pushtet thotë se SDSM po e përdor incidentin për të fituar kredibilitet politikë.

Albanews

Interneti, "armik" i librarive

Dashuria e Australianëve  për  blerje nëpërmjet internetit ka çuar në krizë  shumë dyqane dhe tashmë ka goditur edhe libraritë.

Dy zinxhira të mëdha librarish (Borders dhe Angus & Robertson) me më shumë se 200 librari në të gjithë vendin dhe 2.500 të punësuar, tashmë janë vendosur nën kontrollin e menaxherëve.

Sipas drejtuesve të kompanive, problemet e tyre financiare janë pasojë e  faktit se lexuesit e librave tashmë  mund ti blejnë nëpërmjet internetit (kryesisht nga SHBA) me gjysëm çmimi.

Albanews